Shakespeare's Sonnets in Romani - Шекспир Уильям - Страница 7

Сонэто 059

Ничи́ нанэ́ нэво́, саро́ ґара

Про свэ́то англэды́р сыс; пхагира́са

Шэрэ́, сыр бы нэвэ́с кхабнэ́ пэра,

Дуй мо́лы бияндлэ́нца лэн лыджя́са?

Нэ ла́са тэ дыкха́с палэ́; пхэрды́

Пандженгри шэлбэрша́ лыла́ дживэ́нас:

Сыка́в тыри́ патри́н, сыр вычиды́,[47]

Сыр бы пхурэ́ тут дро сунэ́ дыкхэ́нас.

Нэ на джино́м, пал тутэ со пхэндлэ́,

Дыкхи́ прэ адая́ буты́ Дэвлы́тко;

Буты́р ли, тыкнэды́р годы́ киндлэ́,

Иль ангрустя́са джя́ла дром свэты́тко.

Ґалёв, шарэ́нас куч пхурэ́ пора́:

Фэды́р сан дэвэлнендыр,[48] тэ мэра́в!

Сонэто 060

Сыр рат-дывэ́с баро́ паны́ пхурдэ́ла,

Адя́кэ амарэ́ минуты джя́на,

Тэ екх ваврэ́с про штэ́то парувэ́ла,

Бэрша́ ж саро́, со сы про свэ́то, ха́на.

Барьёла чён тэрно́ про болыбэ́н,

Собы екх рат коро́на тэ лыджя́л,

Сыг нашавэ́ла пэ́скро пхэрдыпэ́н,

Тэ ды́кх: банго́, пхуро́ ко гро́бо джял.

Бэрша́ барьякирэ́на тэрныпэ́н,

Палэ́ — чювэ́на бры́нды про чека́т,

Бэрша́ э бандины́[49] дро васт ґаздэ́н,

На чяляки́рла лэн джидэ́нгро рат.

Тро гожыпэ́н дрэ мри гилы́ шарав,

Соб ангил васт бэршэ́нгро тэ ракха́в.

Сонэто 061

Ту рикирэ́са мрэ якха́ кхинэ́

Сари́ рат откэрдэ́ трэ гожыпна́са?

Одя́, сыр ту, традэ́на мрэ сунэ́?

Или ту патриня́ пхарэ́ лыджя́са?

Оди́ тыро́ кэ мэ сы бичядо́

Тырэ́ кхэрэ́стыр дур, соб тэ гинэ́с,

Кицы́ дрэ ладж сы́ битыро́ скэрдо́!

Дарэ́с пал ма́ндэ, сыр дрэва́н камэ́с?

Тро камлыпэ́н на дя́кэ зорало́,

Мро́ камлыпэ́н раты́ ман джянгавэ́ла,

На дэ́ла тэ сова́в миро́ ило́,

Ваш тукэ шынгалэ́са[50] служынэ́ла.

Мрэ думы сы, соб мрэ сунэ́ тэ хан,

Коли́ дур ма́ндыр, паш ваврэ́ндэ сан.

Сонэто 062

Сы грэ́хо, нэ камэ́л пэс ка́жно якх,

Саро́ мро мас, оди́ миро́ саро́,

Нашты́ тэ отчюрда́в дош адая́,

Барьёл андрэ́ хор дро ило́ миро́.

Патя́ва: муй саво́ нанэ́ вави́р,

Чячё, шука́р! Шука́р, пир чячипэ́н!

Мэ кокоро́ гина́ва: сом шуки́р!

Ваврэ́ндыр учеды́р дро гожыпэ́н.

Коли́ дыкха́ва мэ буты́р миштэ́с:

Ман парудя́ холя́са пхурипэ́н,

Пэс тэ кама́м ма́нгэ набут пхарэ́с:

Сы др одова тыкно́ хохаибэ́н.

Сыр ту сан мэ, шара́ва кокоро́

Мирэ́ бэрша́ дро го́жыма тыро́.

Сонэто 063

Паш ма́ндэ камлыпэ́н миро́, сыр мэ,

Бэршэ́нца о васта́ вышутькирдэ́,

Рат шылало́, чека́т сы скэдымэ́:

О бры́нды тэрныпэ́н хор гарадэ́.

Сы дром амэ́нгэ дрэ да рат бари́,

О гожыпэ́н, кай сыс ёв рай, родэ́са:

Сарэ́са нашады́ сы ягори́.

Лына́скро кучипэ́н сыр ту зракхэ́са?

Нэ мэ ада чёрья́тыр на дара́ва,

Бэршэ́нгирэ чюрья́тыр сом зракхно́:

Мэ николи́ дава́ на забистра́ва –

О гожыпэ́н гудло́, мэк хасино́.

Шукарипэ́н дрэ мрэ лыла́ дыкхно́,

Одо́й зракхно́ ячья́пэ зэ́лэно.

Сонэто 064

Коли́ дыкхтём бэрша́, сыр хаськирэ́н:

О кучипэ́н баро́ — нанго́, муло́,

Шука́р фэлатина́ тэлэ́ пэрэ́н,

Састы́р кирнёла, ґара́ зорало́.

Э пхув паны́ чинги́рла бокхало́,

О брэ́го дэ́лпэ, трашано́, палэ́;

Э пхув паны́ традэ́ла пасиндло́, –

Барьёна тэ тыкнёна адалэ́.

Коли́ дыкхтём, саво́ паруибэ́н,

Со парувэ́ла пэс ёв кокоро́,

Мэ ґалыём, сыр о бэрша́ явэ́н,

Чёрэ́ла ёв о камлыпэ́н миро́.

О мэрибэ́н нашты́ тэ парува́в,

Кама́м, соб тэ дара́в тэ нашава́в.

Сонэто 065

Састы́р, о бар, пхув тэ баро́ паны́ –

Вса лэ́ла корори́ хась зоралы́.

Сыр вырики́рла[51] ада шукарны́ —

На зоралы́, сыр лулуди́ ковлы́?

Кхандэ́ла дро лына́, сыр э ягви́н,

Нэ улыджя́на дывэса саро́:

Барэ́ бара ковлякирдэ́ исы́н,

Бэрша́ састы́р дандырна, сыр маро́.

Дрэ дар рова́ва: кай тэ згарава́в

Бэршэ́ндыр холямэ́ндыр лачё бар?

Сыр лэ́нгирэ ґэра тэ зрикира́в?

Данда, соб тэ на́ хан саро́ шука́р?

Дова нашты́! Саекх камлы́ патри́н

Дрэ мрэ чиндлэ́ лава́ джиды исы́н.

Сонэто 066

Кхино́, мэ со́м бахтя́са тэ мэра́в,

Сыр куч ничи́ буты́р мэ на латха́в

Прэ пхув, кай бокхалы́ мэрэ́л Паты́в,

Кай Чячипэ́н вытрадыно́ дро и́в,

Кай уриды́ сыр э бори́ Холы́

Бикнэ́ла о чяенгро Жужыпэ́н,

Кай Зо́р кирнэ́с пхутёл э хоханы́,

Раня́са сыкадёл: лав на́ выпхэн!

Кай муй Гиля́кэ запхандло́ миштэ́с,

Кай сыкавэ́ла Дылныпэ́н сарэ́нгэ

О дро́м, кай на дыкхно́ Дэвэ́л амэ́нгэ,

Кай Лачипэ́н кандэ́ла «Нажужэ́с».

Кхино́, мэ со́м бахтя́са тэ мэра́в,

Нэ сыр про свэ́то тут тэ ачява́в?!

Сонэто 067

Катхы́р дрэ лэ́стэ сы да кирныпэ́н?

Саро́ паш лэ́стэ кучипэ́н — шутло́:

О грэ́хо сыкадёл о учипэ́н,

Сыр бы дыксёл набут патывало́.

Палсо́ дро лолыпэ́н чямья́ макхья́,

Соб тэ джидёл о муй, сыр бы муло́?

Палсо́ чачё ладжя́ла гожыпэ́н,

Коли́ ж нанэ́ адя́кэ захало́?

Палсо́ дживэ́ла, коли нашадо́

Саро́, со лэс прэ Пхув, хай, рикирэ́ла?

Мангэ́ла ёв джидэ́ндыр рат джидо́,

Нэ со-то лэ́стыр Ёй дужакирэ́ла:

Соб тэ дыкхэ́н, Ёй рикирэ́ла лэс,

Бэрша́ сыр бут хаськи́рна холямэ́с.

Сонэто 068

Сарэ́ дрома, со прогэя́ чячес,

Прэ лэ́скирэ чямья́ миштэ́с дыкхнэ́:

Кай гожыпэ́н сыс — на латхэ́ла лэс,

Тэ про чека́т бэрша́ на хоханэ́.

Ёв на чёрдя́ бала совнакунэ́

Тэрнэ́ шэрэ́ндыр, соб тэ вытховэ́л,

Соб дуйто мо́ло о бэрша́ тэрнэ́,

Ваврэ́нгирэ лына́, тэ продживэ́л.

Дыксён бэрша́ прэ лэ́стэ прогэнэ́,

Дро макхипэ́н лоло́ на гарадэ́,

На обчёрдэ́ о тэрныпэ́н ёнэ́,

Пэс хоханэ́с, нэвэ́с на уридэ́.

Э Дай Бари́ лэс палдава́ ракхэ́л,

Соб дром о чячюно́ тэ сыкавэ́л.